Bonjorn !
(J') É pas tant ben dromi. Le derriér tabè (‘rêve’) que j’é fét ére que j’aviévo doux chèques de cenquante mille francs dedens ux pochies. Il reprèsente probablament la mavua fonccion de prèsident du CVP ; su èta noma pèr aclamacion hièr (a côsa que nion ôtre voliéve avér la place). Ceti tabè motre adrét que j’é un pou puére des rèsponsabilitâts de ceta novèla fonccion… Rèpèticion L’aviévont tués una bôna vâla (‘humeur’). N’ens yu una bôna vouèrba (corse) d’èchôdement de la vouèx ; en particulièr por que n’èproviéssiens de chantar ‘més riond’, en particulièr les ‘a’. U temps de la rèpèticion, yaoue nos nos sens concentrâs sur « Quenta Via » et « Bonjorn Marie », Mathieu nos at fét respèctar les pianisimos que sont marcâs et l’at atèchiê por que nos chantèssens des ‘frâse musicâles’, en place de copar la musica en môrs (bocons). Le composicion de Mathieu, « Quenta Via » l’est fran béla et l’est pas ésiê (lêna) a chantar ; n’ens ben de chouses a tornar chantar en boclle et drét après fôt passar a d’ôtres chouses franc difèrentes ; nos regardens (gouètens) oncor pas prod en dèvant cen que nos devens chantar jesto après. L’Assemblâye Gènèrâla 2016 Ouè, n’ens yu l’Assemblâye Gènèrâla du côr hièr, que l’est éta franc ben animâye du prèsident Perro-Tonio Môre ; una structura cllâra qu’a fét tot alar en dèvant sens problèmo. Nos sens éta 49 mondos a l’assemblâye adonc n’ens oncor ben d’acuèt (d’ènèrg.ie), coment diont les Vôdouès. N’ens parlâ du concèrt que vent et Dzakye l’at prèsentâ coment l’est après enganciér (organisiér) les chouses avouéc des Friborgês por fére cél concèrt avouéc lor lo 26 de mêrs (mârs) 2017 en Martigny, et lo 1er d’avril dens u canton de Fribôrg. Nos sans (savens) que nos volens chantar a la féta d’Einvèrdon 2017 lo dessando 23 de sèptembre 2017 u concèrt de l’après-denar (après-miejorn) et a la velyê des associacions de patoués. Mas volens-nos asse ben animar la cèlèbracion oeucumènica du lendèman ? Dzakye et Mathieu songeont que serêt un pou complicâ, porquè (mémo se) l’arat ben des membros des associacions sur place ; d’ôtres serant lagnâs (mâféts) et vodrant tornar en Valês après lo spèctacllo de dessando nuét. Un membro l’at proposâ de participar a la féta cantonâla du patoués 2017 ; cen balyerêt més târd l’oportunitât de balyér des concèrts avouéc de tèâtro. Nos sens pas dedens la fèdèracion valêsana mas qui sât nos porrans étre invitês. N’ens possu devisar de tot cen et nos cognètre un pou mielx u tôrn d’un verro et d’un possegnon de chocolat, chips et biscuits de Chalendes. Grand mèrci a Perro-Tonio que l’aviéve organisiê tot cen et que l’at (bête!) ovêrt mémo-lui les fiôles de vin rôjo !
0 Comments
|
DzakyeEt tués celos què vôlont partecipar... Archives
September 2017
ENVOYÊD-NOS VOUTRES FÔTOS ! |