L'est pèr Châtélnôf que nos nos sens rècontrâs. N'irons dens u pêlo de rèpèticion, pas por chantar ceti viâjo, mas por discutar des statuts. Le Perro-Tonio, le prèsident l'at ben mènâ cela sèance, en risent més que d'habituda; heroxament por lui que la prèssion des concèrts des 3 et 4 de janviér s'ére envanita!
L'avéve ben una cenquantanna de membros por ceta assemblâye, tot u tôrn d'una tâbla demèsurâbla! Les statuts sont éta discutas et la cotisacions l'est éta fixêe a 30 francs pèr an. N'ens pas besouen (manca, fôta) de tant de francs de cen que la fondacion du patoués nos sotent por prôd de chouses, mas l'est cen que sont tués prèstos a balyér. L'at mémo quârqu'un que l'at dèmandâ s'ére possîblo de balyér més que cen que l'est staturèro! Cen motre adrét (ben, franc) coment quârques un sont enragiês (atoris, passionês) du patoués! N'ens un novél membro du comitât; un g.endârme (gâpian) rètrètâ que l'est benvegnu por sotenir lo prèsedent et Dzakye, en particulièr quand n'ens des concèrts a organisiér (pas avant l'an que vent mas tot un...). Le prèsident l'at proposâ que châcon sè prèsentesse, cen que n'ens fét, quârques-un en patoués et dens la bôna vâla (humor). Perro-Tonion l'avét portâ d'égoue et de cllâr de pomes, adonc les côristes sont un pou éta rècompensâs d'étre sobrâ tant qu'a chavon! Avouéc tués les novéls membros fôt aprendre a sè cognètre, en chantent mas asse ben en cortèrgient!
1 Comment
L'est tot forni. N'ens ja fét les douves serenârdes et l'est éta un trionfo! Nan, pas franc, mas n'ens yu més de spèctators que n'avévons espèrâ; ona centanna en Vessoûye ( Vissoie ) et u tôrn des doux cent per Nenda-Hôta ( Haute-Nendaz ).
A la fen du sècond concêrt, Mathieu ére gyèlârd èxtatique! L'avéve un grôs sourire sur la face et nos at franc ben mimâ un franc et cllar "Mèrci" jesto après la fen des dèrrriéres notes de musica. N'ens yu la visita u concèrt de Marcel Thürler, rèsponsâblo des patouésans de Fribourg et asse ben des patouésans enternacionâls. L'avéve Monsior Bovy rèsponsâblo des côrales Valêsannes, et asse ben Monsior Dayer, le compositor de la noutra futura mèssa en francoprovençâl (ou arpitan). L'avéve oncor cél que l'at fét les parôles por ceta mèssa mas j'é obliâ lo siô nom. Ouè, l'est tot ben alâ. N'ens amaeê (hèsitâ) quârques côps mas n'ens tot lo temps reussi de forni noutres chançons. L'avéve ben des pièces que semblâvont étre "rechintues" per les chantres: le cohèsion de tués s'est brâvament dèvèlopâe. Pèr Vessoûye, un film l'est éta fét et Mathieu l'at enregistrâ l'odiô. Per Nenda-Hôta, la méma chousa l'est éta féta per celos que s'ocupont du sito de patoués http://www.patoisdenendaz.ch/ . Ils vant colaborar avouéc nos por prèsentar noutro concêrt... En atendent, se vos-éd quârque chousa, s'o-vos plêt mandâd-mè (envoyêd-mè) les voutres fôtos ou enregistrèments por lo sito! |
DzakyeEt tués celos què vôlont partecipar... Archives
September 2017
ENVOYÊD-NOS VOUTRES FÔTOS ! |